حوار مع أسامة المغازي أول مصاب في الثورة المصرية بالاسكندرية يوم جمعة الغضب 28 يناير ملف شامل بالصور و الفيديو


أسامة المغازي أول مصاب في الثورة المصرية بالاسكندرية يوم جمعة الغضب 28 يناير

نزل المظاهرات و حياته على كفه ربنا كتبله الحياة و قدرله فقدان كفه

حوار : حازم حسنين

صورة لحظة إصابة أ- أسامة أمام مسجد القائد ابراهيم في جمعة الغضب

الحوار الآتي مع أ- أسامة المغازي الرجل السكندري الشهم الذي يعتبر من أول مصابي الثورة بالاسكندرية قابلته في مليونية الارادة الشعبية حيث إنه لم يغادر الميادين سواء في التحرير أو في الاسكندرية و لم يمل المظاهرات رغم إصابته برصاص الغدر من كلاب النظام السابق….

طبعاً معرفتش أتحاور معاه على روقان لأن معجبينه كتير و ناس كتير متعرفهوش لكن لما تعرف قصته بتجري عليه تبوسه و تحضنه  و تدعيله بالشفاء..

قابلت أسامة بحديقة الخالدين يوم الجمعة 29-7 و تحدثنا عن أمور كثيرة نسردها في السطور القادمة……….

…………….؟

أنا الحقيقة في الاربعينات من عمري أعمل موظف بإدارة ميناء الاسكندرية و أسكن بالسيوف متزوج و لدي ثلاثة أولاد…

………….. ؟

أنا نزلت المظاهرات من يوم 25 يناير و دوافعي هي دوافع كل مصري نزل اليوم ده عشان يهتف بسقوط النظام … كلنا لينا مطالب و حقوق شرعية محتاجين إنها تتطبق مش شرط تكون مطالب مادية … الكرامة هي الهدف الاساسي

…………؟

الحقيقة أنا انتمائي لمصر … ما كانش ليا انتماء سياسي معين ما انضمتش لأي أحزاب… كلنا هدفنا مصر المفروض كلنا المفروض نبقى حزب واحد …لأن أي حزب لازم يكون هدفه مصر أي حزب يحط مصلحة مصر قدامه أنا معاه … الأحزاب هي الرقابة الشعبية على الحكومة في كل المجالات التعليم و الصحة و كل حاجة و تبقى كده قدرت تعمل توازن بين الحكومة و المعارضة لما كل واحد منهم يشوف شغله كويس البلد حتتقدم… لكن للأسف في السنين اللي فاتت ما كانش ليها لازمة

…………؟

من يوم ما نزلت في 25 يناير و شفت حماسة الناس بعينيا و عرفت إن إحنا أقوياء و بعد ما وصلتنا أخبار السويس و هي شرارة الثورة  و لما شفت العنف اللي كان بيمارس ضدنا و الاعلام الحكومي الكاذب كان إعلام حرب … لكن ده مخوفنيش بالعكس زادني قوة …

……….؟

يوم 28 يناير طبعاً أنا كنت في المظاهرة اللي انطلقت من جامع القائد ابراهيم هنا … و الامن المركزي كان نازل بكل ثقله هنا في المظاهرة دي لأنه عارف إن القائد ابراهيم هو النقطة الحاسمة في اسكندرية و حاول إجهاض مظاهرتنا و بالفعل اتفرقت المظاهرة ناس طلعت على البحر و ناس على الترام أنا كنت في المظاهرة اللي اتفرقت على البحر… و كان بيندس وسطينا ناس من المباحث و أمن الدولة بيحاولو يوجهوا المظاهرة و يفرقوها فأنا انتبهت للحكاية دي و أخدت أنبه الناس و أحذرهم و أشجعهم إننا لازم نتقدم و نواجه عساكر الامن المركزي لأننا أقوياء بعددنا صحيح اننا عزل لكننا أقوياء…. و من هنا بقى كان واضح اني بقود المظاهرة و واقف في الصفوف الاولانية …

تقريباً بقيت مستهدف  لكي يجهضوا المظاهرة بتخويف الناس بمنظر دموي و بالفعل بدأت الطلقت تنهال تجاهي … الطلقة الاولى و هي عبارة عن شبه قنبلة صغيرة تصطدم بأي جسم فتنفجر … هذه الرصاصة لحسن حظي ارتطمت بالارض و أصابتني فقط شظاياها في صدري و قدماي … و بينما كنت أحاول التماسك و الوقوف من جديد جاءتني الرصاصة الثانية التي أصابت يدي اليمنى و فوجئت بنافورة من الدم و كأنني أُمسِك بسيخ حديدي مشتعل و بدأ العظم يسيح و تساقط الجلد و اتحاميت في الناس اللي نقلوني للمستشفى الميري…

………؟

في المستشفى بقى أسعفوني و حكيتلهم ما حدث معي و كذلك كان معي الشهود لأجل اثبات ذلك في التقرير الطبي لكني فوجئت بأنهم كانوا يريدون تسجيلها على أنها اصابة عادية حيث كان رجال أمن الدولة مسيطرون على المستشفى….

قلت للطبيب: لو مكتبتش اللي حصل حقي حيبقى عندك مش عند الشرطة

 

………؟ و بسؤاله عن مافعلته الدولة لمصابي الثورة

الدولة لغت التوقيت الصيفي هذا ما فعلته الدولة

و كمان حيعملوا الشهر 33 يوم….

الدولة معملتلناش حاجة يا أستاذ … كل اللي بيتقال في التلفزيون ده أي كلام إحنا محدش عبرنا بعد الثورة ب سبع شهور…. كل اللي عملوه إنهم امبارح بس صرفولنا 5000 جنيه عشان خايفين من مظاهرات النهارده الجمعة … لعلمك أنا صارف 12 ألف جنيه علاج عشان إصابة ايدي اليمين و الشظايا اللي ف رجلي …

إزاي تبقى شاركت في إسقاط النظام و محدش يعبرك؟؟؟؟

لو ما أخدناش حقنا حناخده بدراعنا و دمنا و الظباط اللي كانوا بيضربونا و القضاء سايبهم الناس مش حتسكت عليهم و حتاخد حقها بدراعها و ده حقها ……..

…….؟ بسؤاله عن الفراغ الأمني

كلنا عارفين إن الشرطة هي اللي عاملة البلطجية و مساعداهم و هم اللي مشغلينهم …. دلوقتي الحرامية بيخافوا لأنهم عارفين انهم لو وقعوا ف ايد الاهالي مش حيطلعوا سُلام … إنما الاول كان يدي 20 جنيه لأمين الشرطة أو ينصص معاه و يسيبه…

…….؟ بسؤاله عن إحنا آسفين يا ريس

بالنسبة للناس دي دول فلول بيحاولو يجمعوا قواتهم هما مجموعة من المنتفعين من النظام السابق و بيحاولوا يفرقوا الناس و يقسمونا لسلف و اخوان و ليبراليين و مش عارف ايه … و بينزلوا في روكسي و مصطفى محمود بدون هدف …

لو الثورة دي عاملة زي البرتقانة و هما شايفين البرتقانة كلها مع الشعب بيحاولوا بقى ياخدوا نُصها و شوية و حيسرقوها مننا…

……..؟

بالنسبة للأوضاع الحالية في البلد ف المجلس العسكري هو المسئول عنها لأنه عمل على خلق تعددية حزبية رهيبة و بيساهم ٌنه يخلي الشعب كله يخبط في بعضه زي ما حصل في العباسية و الكماشة اللي اتعملت على المتظاهرين و حتى هنا في سيدي جابر أنا كنت موجود كان ظابط أمن دولة بيحاول يوقع الناس في بعضها و حصلت الوقيعة عند المنطقة الشمالية العسكرية…

أساليب المجلس العسكري عشان يلهينا الاول فزاعة البلطجية و بعدين فتنة بين مسلمين و مسيحيين و الجديد بقى فتنة بين المسلمين و المسلمين و ربنا يستر لازم كلنا نتوحد و نبقى إيد واحدة…

كلمة أخيرة أحب أقولها ” و ربي لن يجف دمي حتى آخذ حقي ” ربنا اللي حيجيبلي حقي و أنا مش حاقعد ساكت و حاسعى عشان آخده و القصاص هو الحل ….. الشهداء و المصابين بيتم المتاجرة بيهم  من أحزاب و ائتلافات و حكومة و محدش بيبصلنا فعلاً…..

الدولة  لازم تهتم بينا شوية ده لو في حكومة محترمة……..

………………………………………….

إلى هنا انتهى حواري مع أ- أسامة المغازي و لاحظت منه إيمان بالقضية قضية الحرية و تطهير البلاد  لاحظت منه قوة و حماس تمنيت أن أراها في عيون كثيرون من حزب الكنبة ….. و لمست نبرة حزن نتيجة التجاهل لمصابي الثورة رغم أنهم الأبطال الحقيقيون دفعوا ثمن الحرية من دمائهم و أجسادهم …..

تحية للمغازي و لكل مصري شريف……..

Post a comment or leave a trackback: Trackback URL.

تعليقات

  • ayman salah  On أغسطس 1, 2011 at 2:38 م

    أسامة المغازى لأول مرة أقابل أحد مصابى ثورة 25 يناير واحط يدي فى يده وكان لي الفخر وإكتشفت إن دول عظماء مصر الحقيقيون أسامة المغازى هذا الرجل رأيت فى عينيه بريق الفخر لما قدمة من تضحية لحرية ولكرامة شعب مصر هذا الرجل ندين له طوال حياتنا تحية كبيرة لشهداء 25 يناير وإحترام وتقدير وإعتزاز لأسامة المغازى وكل مصابى ثورة 25 يناير

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: