مارك بوكانان و أحداث مجلس الوزراء


 

يوم  23 يناير 2011 كنت أقرأ  كتاب لعالم فيزياء أمريكي  اسمه مارك بوكانان .. كان عنوان الكتاب ” الذرة الاجتماعية.. لماذا يزداد الأثرياء ثراءاً و  الفقراء فقراً ؟ ” … كتاب عمنا بوكانان بيتكلم إن سلوك البشر خاصةً في التجمعات يُشبِه إلى حد كبير تفاعل الذرات كما في علم الفيزياء حيث أن سلوك الأفراد يشبه الذرات حين تلتقي فيحدث بينها تفاعل و رد فعل و تنظيم ذاتي معين و كما تؤدي الجاذبية بين الذرات إلى جوامد متماسكة تغدو التبادلية بين الأفراد و الجماعات أداة للتعاون و التماسك في الكيان المجتمعي. و يمكن تطبيق عدد من نظريات الكتابعلى سلوك الأفراد سواء في المظاهرات أو الاعتصامات فإن الواضح أن العنف يولد عنف و أن سلوك فردي سلبي قد يجعل المظاهرة كلها تنقاد كما القطيع في إتجاه معين رغماً عن رغبة الجميع … و هي دي دايماً مشكلتنا سواء مع الأنظمة السابقة أو المجلس العسكري حالياً إن الحلول دايماً حلول أمنية يتم فيها إستخدام القوة المفرطة..

يقول مارك بوكانان في إحدى فقرات الكتاب :

“إن جوهر التنظيم الذاتي هو أن شيئاً أو عملية ما “أ” تؤدي إلى أخرى “ب” و التي بدورها تؤدي إلى مزيد من”أ” فإلى إطلاق المزيد من “ب” فمزيد من “أ” و هكذا على التوالي كلولب يتزايد فيه رد الفعل الإرتجاعي “feedback” .. هبوط أسعار بعض الشركات يجعل الناس يبيعونها , مما يؤدي إلى مزيد من خفض السعر .. إثارة شخص واحد للشغب يجتذب آخرين فينضموا إليه .. ممر في منتزه عام ـ لا يكاد يرى ـ يحفز بعض الناس على أن يسلكوه و آثار أقدامهم على العشب تجعل الممر أكثر وضوحاً فإجتذاباً للآخرين .. رد الفعل الارتجاعي على هذا النحو كثيراً ما تكون له أهمية محورية .. بيد أنه لا يتضح إلا عندما يفكر المرء فيما بين مختلف جوانب النظام من تفاعلات بدلاً من التركيز بشكل مبالغ فيه على الجوانب نفسها ”

الخلاصة من الكلام ده إنك لازم في موضوع أحداث مجلس الوزراء انك تبص للموضوع بنظرة صحيحة تحدد إيه هو الفعل الأساسي و ايه رد الفعل ..

أتفق معاك إن الوضع دلوقتي و الأحداث اللي اتفجرت بدءاً من فجر الجمعة 16 ديسمبر مُحيِرة جداً .. لا انت عارف تقف في صف الجيش و لا ف صف الناس التانيين ” ممكن يكونوا ثوار أو بلطجية أو الاتنين “

عندك كام نظرية ممكن تتبناهم مثلاً:

         الناس اللي قدام مجلس الوزراء بلطجية لأنهم بيعطلوا المراكب السايرة و يستاهلوا الحرق

         الجيش ابن كلب لأنه بيضرب ناس عزل قدام مجلس الوزراء معتصمين سلمياً

         و إذا كنت من  أصحاب فكرة  المؤامرات الأيديولوجية ممكن تكون مقتنع جداً إن دول شوية عيال ليبراليين على علمانيين عايزين يأجلوا الانتخابات

أؤكدلك انك ممكن تلاقي فيديوهات تؤكد أي وجهة نظر تتبناها من دول مثلاً حتلاقي صور لبلطجية ماسكين طوب بيحدفوه ع الجيش و حتلاقي صور لعيال بيرموا مولوتوف ع المباني و في المقابل حتلاقي جنود من الجيش بيعتدوا على ستات و معاهم مسدسات الله أعلم هي مسدسات صوت و لا لأ و حتلاقي جنود جيش برضه بيحدفوا طوب و أطباق من فوق مجلس الوزراء و حتلاقي فيديوهات  لانتهاكات الجيش و أيضاً لشباب بيرموا مولوتوف على المباني و بيهتفوا الله أكبر!!!!

الثوار مش ملايكة….

لو انت من شباب الاستقرار و منزلتش مظاهرات قبل كده خالص خاصةً فترة ال18 يوم بتوع الثورة  أكيد حتقول ع الناس دول بلطجية لأنك شايفهم بيولعوا و بيحدفوا طوب … و ده اللي أنا عايز أقولهولك ان مارك بوكان قال ان العنف لا يولد الا عنف و إثارة شخص واحد للشغب يجتذب آخرين فينضموا إليه .. و أحب أوضحلك ان الثوار مش ملايكة بجناحين و لابسين أبيض…  بالعكس الثوار ممكن يكون فيهم ناس عصبية و ممكن يحدفوا طوب و ارجع لمشاهد موقعة الجمل و أمام اقسام الشرطة حتلاقي الثوار مكانوش بيسكتوا على العنف اللي بيلاقوه من رجال الشرطة بل بيحاولوا يوقفوه عند حده..و كمان مفيش ثورة قامت سلمياً مية ف المية لأنك ببساطة لازم تتخلص من اللي كان قاطع عيشك و هو فعلياً حُر و بيلعب في مصر رغم الثورة..

لعبة قذرة

كمان عايز أضيف إنه من السهل جداً عن طريق لعبة بسيطة قذرة من أي جهة سواءاً المجلس العسكري أو أمن الدولة اللي صاحي و بيلعب أو حتى من الفلول سهل على أي حد فيهم إنه يبعت بلطجية تشعلل الموضوع لأغراض في نفسه…

المجمع العلمي و كرامة المصري

في النهاية إحترق مبنى المجمع العلمي و ما يحويه من كنوز ثقافية و علمية رهيبة و لا أعلم مدى الخسائر حتى هذه اللحظة و بالتأكيد مصر خسرت شيئاً غالياً في تلك الأيام ليس فقط قيمة علمية مثل مجمع العلوم أو مقتل شيخ و عالم أزهري جليل و طالب طب البراءة تطل من عينيه … لكن مصر خسرت فعلاً الكرامة و صور جنودها يسحلون نساءاً عراة في الشارع  و يقذفون أطباق من أسطح المباني.. خسرنا قيمة الإنسان المصري  خاصةً و أن كثيراً من شعبنا يقول تلك الكلمة بكل سهولة ” أحسن هما يستاهلوا “.. في يوم اشتري المصري كل اللي ما يشتري اتفرج على كرامة مصر عريانة..

لكي الله يا مصر……..

 

أخيراً أترككم مع قصيدة الأبنودي العظيمة

يا عم الظابط انت كداب و الى باعتك كداب
مش بالذل هشوفكم غير او استرجى منكم خير
انتو كلاب الحاكم و احنا الطير
انتو التوقيف و احنا السير
انتو لصوص القوت و احنا بنبنى بيوت
احنا الصوت ساعت ما تحبو الدنيا سكوت
احنا شعبين شعبين شعبين
شوف الاول فين و التانى فين
وادى الخط ما بين الاتنين بيفوت
انتو بعتو الارض بفاسها بناسها فى ميدان الدنيا فكيتو لباسها
بانت وش و ضهر
صدر و بطن
ماتت و الريحه سبقت طالعة انفاسها
و احنا ولاد الكلب الشعب
احنا بتوع الاجمل و طريقه الصعب
و الضرب بسن الجزمه و بالكعب
و الموت فى الحرب
لكن انتو خلقكو سيد الملك جاهزين للملك
ايدكم نعمت من طول ما بتفتل و بتفل ليالينا الحلك
انتو الترك و احنا الهلك
سواها بقدرته صاحب الملك
انا المسجون المطحون الى تاريخى مركون
و انت جلاوون و طالون و نابليون
الزنزانه دى مبنيه قبل الكون
قبل الظلم ما يكسب جولات اللون
يا عم الظابط احبسنى رأينا خلف خلاف
سففنى الحنضل و اتعسنى رأينا خلف خلاف
احبسنى او اطلقنى و ادهسنى
رأينا خلف خلاف
و ان كنت لوحدى دلوقت
بكره مع الوقت
هتزور الزنزانه دى اجيال
و اكيد فيه جيل اوصافه غير نفس الاوصاف
ان شاف يوعى و ان وعى ما يخاف
انتو الخونه حتى لو خانى ظنى
خد مفاتيح سجنك وياك و اتركلى وطنى
وطنى غير وطنك
و خرج
قلت لنفسى ما خدمك الا من سجنك

Post a comment or leave a trackback: Trackback URL.

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: